...Its My Life..

    Tunlaia kan tawngkam lar tak, a bikin tleirawl/rawlthar ten kan hman uar em em chu “It’s My Life” tih hi a ni awm e. Nitin suahsual rawngbawl thin te, Mahni inchhungkhurah pawh awm tha duh lo leh khawtlang tan pawha mi hnawksak kan tih te hian ‘Hei hi ka nun a ni, ka thu thuin ka awm ang(It’s my life)” kan ti puam talh talh thin.
Tin, Lehkhathiam tak tak, mahni intodelh leh midang mammawh lo nia inngai te zingah pawh an awm tho mai. “Ka NUN chu ka ta a ni a, ka thu alawm, ka duh dan dan in ka nung ang chu, tuma sawisel theih ka ni lo” kan ti thin maw ??  NUN awmzia kan zir chian deuh a ngai a ni.

Mihring Nun hi eng nge kan tih chuan - Thaw thei, Na thei, ngaihtuah thei, duh thlang thei, rilru nei leh thi thei a ni. Mahse - Kan samzai pakhat pawh hi keimahni thuin a chawr lo va, kan mar vawi khat phu pawh kan thuin kan ti tawp thei lo. Engmah lo atanga siam kan ni a, ka taksa vaivut atanga saruak maia siamah chuan ‘NUNNA’ thaw avangin kan lo nung mai a ni. Chu nunna thaw chu Pathian ka atanga chhuak a ni. Nun min petu chuan a duh huna lak let leh mai theihna (power) a nei a ni.  Chuvangin nun min petu  Pathian ta kan ni.

    
Mihring chu chhia leh tha hriatna, duhthlanna nei a siam kan ni a. Chu duhthlanna hmang chuan Eden huanah khan Setana bumin kan lo awm ta a. Pathian atanga chhuak NUNNA thaw avanga nung mihring chuan ‘It’s My Life’ tiin Setana duhzawngin a nun a hmang ta a. Bawhchhiatna sualah a tlu ta ! Pathian anchhia khumin, Chatuana boral tur leh Hremhmuna paih hmabakin a nung ta a ni. Mahse, ‘nun’ min petu Pathian chu khawngaihna leh hmangaihnaa khat Pathian a nih tlat avangin Chatuan Hremhmuna paih tur leh engtikawng maha thiam channa nei tawh lo chu, A fapa Isua Krista ngei, kan sual tlanna atan hmangin, kan thih ai thi turin a rawn tir a, min tlan nan Kalvari tlangah khen behin a awm ta. Tlan chhuah i ni tawh. I nun kha i ta a ni tawh lo.

    
Kawng dang lehah chuan - Pathian hian mihringte hi cheng ho va,  rawng in bawl tawn a, in tanpui tawn turin a rel a. Kohhran min din sak a, khawtlang leh ram leh hnam angin kan in zawm khawm vek bawk. Hei hi Pathianin mihringte nun dan tura a rel leh ruahman a ni. Chumi kalh zawng a mahni thu thu a awm a, midang zahna leh ngaihsakna nei lo va i awm chuan Pathian pawisawina lian tak leh ram leh hnam, khawtlang leh  Kohhran pawi khawihna lian tak a ni bawk. Nagmah chauhvin khawvelah i nung thei si lo.

    
Mihringin a tih tur pui ber chu a siamtu duhdana nun hi a ni. Thilsiam chuan a siamtu a tilawm tur a ni a, a siamtu duhzawngin a nung tur a ni. Nunna min petu leh min siamtu, min tlantu, Isua Krista tel lo nun chu a ruak a, a tlabal a, a famkim thei lo va, hlimna leh lawmna tak tak a awm thei lo.

    
“Khawnge tuma neih ka ei lo a, ka thawh chhuah hmangin nuam kan chen teh ang, ka ta a ni a, tumah ka ti hek hlei nem” i ti maw ? Thawk chhuak theia siamtu che leh i nunna neitu duh dan ni lo va i nun khan nangmah ngei pawh kha i lungawi em ? i thla a muang em ? Mi hausa leh lazara kha ngaihtuah la, i hmaah eng chhiatna-in nge hmuak che a, engnge i chungah lo thleng dawn tih i hre hauh lo. A tawpah Chatuana boralna, Hremhmun leh Anchhia in a hmuak bawk ang che. Duhthlanna chu i kutah a awm, Pathian meuh pawhin zalenna a pe che a lawm. Mahse i thlang sual ang e. NUNNA nge i thlan dawn THIHNA... Nge  “Hei hi ka nun a nia, ka thu thuin ka nung ang(It’s My Life) i la ti zel dawn?