My Tears

Engmah ka ni lo... ka taksa leh ka thlarau a chau zo ta..!!

Ka thahrui leh ka ruh tuah zawng zawng hi a zawi zo va,

Khawvel hi ka tan ninawm leh thinrimna mai an chang zo ta...

Hneh tumin theihtawpin ka bei ve a, a ni telin ka chak lo a ni...

Hei hi maw an sawi..'nupa tang then' an lo tih chu..?

Ka chhungril hian hlim zai reng a rel thei dawn nem maw ?

Chhungkim kan lawina kan run chhung tahna a chang zo va

Hawina lam apiangah i sulhnu leh i kutchhuakin min lo au si...

Lo ngaihtla teh.. i tel lova hringnun ka hman dan hi...

Hetiang tur hian maw..rihsang mual min liam san le?

Thenrual zingah tel mah ila, min hnem thei an awm lo,

Mahni-a awmin ka in kawm hlim zo chuang lo..!!

I sulhnu chhuiin rilru a thar a, kalsan dawnin rilru a na leh si !

Hawi lam apiang a thim a, thlen chin apiang i sulhnu a ni si

I tel lo chuan leilung hian mawina reng a a nei lo ve

Hringmi danin eizawnna leh nitin hnaah kal a lo tul a...

Lungruala kan in thlahna kawt-kai te hian hrilh an va tihai em !!

Chawfak hun leh tlai ban dawnah chanchin inhrilh hun a lo thlenga

Ka mobile phone hi a a zo ta em ni!! i call reng a dawng thei lo..

Beisei tur awm si lo hi, beidawng takin ka bih vawng vawng thin..!!

Khawhar reng renga chhun ni hmang liamin, 

Run khawhar bel tur leh i sulhnu chhui tura haw a tul leh thin..

I tel lo va, kan run lawi chu ka zuam mawlh lo... ka châk mawlh lo..

Mahse, ka neih chhun ka hraite-in nghakhlel takin min lo thlir reng si..

'Bawihte, ka lo haw thuai dawn e..' tiin ka tlan haw leh dawr dawr thin..

Office bang haw hmasa zawk zawk kawtkaiah in hmuakin,

Hah pawh sawi lova, hmangaih thu kan in fah thin kha..

Tunah zawng hrilh tihai.. bei dawnna mai an chang zo ta..

Duhsaknain hlan tawn a, a thlum a al kan liah dunna dawhkan leh..

I hmun ruak ka en ngam lo.. hrilh ka hai lua e

Thahnem ngai em em a nau chaw fah chunga hlimzai vawrin,

Inchhung khawsak, eirel leh nau enkawla kan buai thin te kha;

Hun hian nitin a rawn herchhuahpui thin a sin..mahse i awm tawh si lo..!!

Kan hun hman dan.. buai tak leh hlimawm tak te kha..

Mahte'n khawhar takin kan rawn chhunzawm thin a sin..

I tel lova zan mu tuah a va huphurhawm thin em..

I zalna hmun, lukham leh Silhpuan ka bel ngam lo..!

Nuhnun tui lova mut zai rel thei lo kan duat lai hi i dawn lo em ni?

A pa tang bela, awm a rawn zen meuh chuan..

Tu pa-in nge tuar zo bik ang le..? Lairil min fan vawng vawng..

- Hlima Ralte/May 10,2014