Sharing: Aw hmangaihna khawvel entu..

KHB No. 140 - “Aw hmangaihna khawvel entu, Kalvari tlang thing kross chungah, Ka Lalpa’n a thlen chu ”. 

      

Kan Kohhran-ah Pathian hnathawh ropui tak a lo thleng mek a. Mi tam takin harhna changin hlim takin Pathian an fak a, an lam mup mup a, kei chuan hmuhnawm thlirin ka lo thlir a, ka nunah engmah tuihnang a awm ve lo..!! 

            

October 31,2009 (Inrinni zan) a ni a, Kohhran tawngtai inkhawm hun a ni. Tawngtai subject  thawhkhawm lai pawhin ka dan pangngaiin ka mutthluk san mai a. Tawngtai hunah pawh ka biaka (Pathian) pawh ka ngaihtuah chuang lo a, eng nge ka dil a, eng nge ka chham pawh ka ngaihtuah chuang lo. Pathian hnen chu sawi loh, keima benga rawngah pawh a cham eih lo. 

            

Tawngtai zawh chuan tawpna hla atan he hla, Kristian Hlabu No.140-na hi inkhawm hruaitu chuan a rawn thlang a. Vawi khat kan sak chhuahnaah chuan ka sa liam ve mai a, a vawi hnihna an rawn nawn chuan ka thinlung hi a rawn chhun keh ta vek ni ber hian ka hria. Ka mittui chu dan rual lovin a luang ta zung zung a.  Kalvari tlang-a ka Lalpa an khengbet lai  leh a tuar lai hmel chu chiang takin ka mitthlaah a rawn lang a. Amah ka phatsan nasat zia leh ka tluksan nasat zia te, ka bawlhhlawh zia te ka hmu uar uar mai a.                    

Ani chuan Kalvari tlangah khan a thih thlengin vawi khatmah min phatsan ve lo va, a thihna tur chu pumpelhna zawng lovin ka dam nan a pan a, a ropuina leh a Pathianna zawng zawng hlipin ka tan zahthlak takin a inpe ral thak si a… "Ka va han bawlhhlawh tak em..Lalpa min ngaidam ang che”. tiin ka tawngtai a.  A hla chang tina, tlar tin mai hian min hneh em em mai a ni..

“Ni lawmawm a lo thleng thuai ang,

Kan Lalpa-in min hruai hunah..

A hmel mawi ka hmu ang…”

- Hliam Ralte/ Nov.8,2009