Christmas without you

Boihtei nu-in min kalsan atanga thlakhat awrh a ni.. Lusun vanglai a ni a, inleng kan la nei ve deuh reng a, hunpui-Krismas boruakin min chim zui nghal a.. kum dang zawng aiin mi an phurin, khawlai leh in vel an chei uar a, Krismas boruak an siam nasa hle mai… Phur taka kawtthler leh khawlai an chei te chu ka nun ram beidawnna leh lungngaihna mit atang chuan an thikawm rum rum mai..!!

I tel lova Krismas kan hman hmasak ber  chuan e ?

Khawhar leh mal ngawih ngawihin ka hmang liam a sin,

Vangkhua a mawi, thler tin an vul zual e..

A mi leng ten hlim zai vawrin phei lai an vawr..

Min dawnpui ve lo em ni, thlafam ngai ka tah hi..?

Krismas a lo hnai ta tak tak a, ka fanu tan Krismas ipkhaia thlak tur leh a lawm zawng engngemaw lei sak ve ngei ka duh si a, huphurh takin Bazar-ah keimah chauhin ka zu kal ve a, Mipui zi nuai nuai karah keimah chauhin khawhar takin ka vei rak rak a, bawihte-i nu nena kan kalna hnu leh kan dawr thin te chu pawh ngam lovin ka thlir vawng vawng mai.. Bawihte-i mamawh.. Tri-Cycle leh dawhthlak tur T-Set te ka lei a, ka in khai bawr ve a.. mittui parawl teuhin ka haw ta ni..

Silhpuan mawi tin thlanga kan fan thin Bazarpui chu..

Mahten ka rawn fang leh.. suihlungruala kan fan hnu..

Mi pa-te chu an kawplai chawnban vuanin kawi tin an hrut,

An hrai leng ten tanglaiah pawmin duh ai an sam, an hlim ngei e..

Ka en ngam lo, lunglam ka vai,luaithli nulin riahrun ka pan..

Krismas Tree te siamin mitinin in leh compound an chei mawi a, Krismas Tree leh an zam en te chu Bawihte-i’n a lawm em em a, mi in cheina te enpuiin an len chhuahpui thin a.. Phur lo hle mah ila, Bawihte-i lawm atan tal siam ve chu tulin ka hria a.. Krismas laia inchhung kan chei na thin Light leh Krismas Tree te chu ka la chhuak a, thiam ang tawk tawkin ka chei ve a, Krismas Tree-ah chuan kan nupa thlalak frame leh Bawihte-i nu tana Krismas Card kan pafa-in thawn chu ka dah a,  bawihte-i chuan a hlimpui hle mai.. mahse katan chuan tahna minthlentu mai a ni si..

Run tin an mawi..Krismas Tree leh Engmawi tinreng nen..

Ka ngai ngam lo, ka hrai tawnah kan run riangte a chul bik tur chu,

Krismas tree -ah engmawi zamin kan chei ve e, thiamtawk te-in..

A hlim ngei e kan hrai duh lai,  chawnban vaiin pheilai a vawr..

Kan rawn hlan che..Krismas chibai… min chhang ta che..!

Krismas Ni a lo thleng ta..  Chak lo hle mah la bawihte-i hruaiin a nute-i te nenkan zu inkhawm ve a..a hrilhaithlak duh hle mai..

A her chhuak ta,  Chhandamtu Lal thar lo pian ni chu..

A mawi ngei ang, leng zawngte tan sikni kawl lo her chhuak hi..

Kei ka tan zawng, nunhlui ngaia lunglen tizualtu a chang zo ta..

A mi hraiten silpuan thar nen chunnu tang an bel..

Kei ka hrai ve chu.. chunnu tel lo zuapa tang a belh hi..!

31 zan-ah lunglen a va zual em.. nunhlui chhui kir leh nun ruak ngawih gnawihin hunk a hmang a, thenrual thate an lo chuangkai a, an cham reng thei si lo..

Rimawi rema pheilai vawrin hlim ten kan hmuak thin, 31 zan

Thenrualte nen hlimlai chenin, kan nui za thin..

Tu dang ngai loten kan hmang thin, chawnban invuan in..

Kan inhlan thin kha..duhsakna leh hmangaih biahthu..

Tapin ka au ruai ruai mai dawn....kan nun hlui kha..

Kumthar leh hun thar hmuakin zaleng an hlim ngei e..

Kei ka tan..zan lungngaihthlak..tahna titamtu a ni si..

Tlang tin a nghing, ruam tin a au, min dawn lovin..

Kei ka chawi lai ka hrai nen run khawhar kan nghak..

Ka dawn kir vawng vawng, kan nun hlui mual liam hnu..

- Hlima Ralte / February 22, 2014