Dikna chu khawiah nge ? Tunge mirinawm chu ?

He thu hi i chhiar liam puat chuan i hriat fo hnu a ni a, i ngaihven zui lo pawh a ni mai thei. Mahse, i ngaihtuah ngun zawh poh leh zawhna i in pe hnem ang a, i zir chian a, i chhui nasat poh leh a chhanna i  van tulh tulh ang a, i zawn nasat poh leh i duhthusam i hmu lo tulh tulh ang..!!

                

Heng thil pahnih hi hausak vanga neih theih a ni mai lo va, rethei leh pachhiate inchhungkhurah pawh hmuh tur a tam chuang lo. Sumdawng te zingah a zalen lo va, kuthnathawkte tan kawl reng a harsat avangin thlauhthlakin a awm leh thin. Chuti anih chuan Dikna chu zawn loh mai tur em ni ? Rinawmna pawh hi um zel lovin thlauhthlak ve mai tur em ni ? Chu chu mi tam berin an ngaihtuah ve theuh avangin Dikna leh rinawmna chu hnawlin a awm a, kawng sirah paihin a awm ta mai a ni !!

                

Kan rilru leh chhia leh tha hriatna-in a dik lo a ni tih kan hriat reng pawhin “mite pawhin an ti ve tho a lawm ”, tiin kan in thlamuan chawp a. Kan phak tawk theuh-ah mi neih ang chu neih ve kan duh zel bawk si a, kan hamthatna tur a nih chuan remchang lem lo leh kan nihna nena inhmeh lem lo pawh mahni inthiamchawp chungin kan ban leh mai thin. Mahse mi tih dan ang a ka tih ve vang ngawt khan ka dik chuang lo a, mi rinawm ka ni chuang hauh si lo.. Thlarau nun ti chautu leh rinna phatsanna a ni zawk!!

                

Ti hian han ngaihtuah teh, nangmah pawhin a dik lo tih i hriat reng leh inthiam loh rukna nei reng chunga “chakna leh awhna sual" i tih thin te kha i thih dawn darkarah nangmah vaw lettu leh i nun ti rumtu an ni dawn..tih hi. Sim hman lo va i thih palh hlauh phei chuan Lalpa hmaah  i in sawifel zo hauh lo vang..!! Dikna Pathian a ni si a..I lo tisual tawh a nih pawhin simna hun a la pe cheah ngai la, sim rawh..Khawvel hausakna te, rohlu leh in leh lo kha Chatuan Boralnaa hruailuttu che an ni hlauh dah ang e.

                

Hun tha kan la neih lai hian Dikna chu zawng ila, Rinawmna chu a umin i um zawk ang u. Kan Pathian, ‘Dikna Pathian’ chuan Dikna Lal Tiang hmangin ro min la rel sak dawn si a.  

Dikna chu mi tih danah teh chi a ni lo va, sawi dik chawp leh siamrem chawp thil a ni hek lo.. Thil dik lo a awm a, dik lo zawk chu kan hnawl a, kan tih loh khan kan dik a ni mai.. Dikna chu amahin a fel mai a, sawifel chawp leh tih dik chawp a ngai lo. Mi dik chu a thiamna leh finnah ni lovin a moral-ah a lang chhuak thin. Rinawmna pawh insawi rinawm chawp leh miten an rin em avanga rinawm a ni ringawt lo va.. thudik tana, nghak a, tuar fan fanna hi a ni. 

Mi dik chu a thiamna leh finna ah ni lovin a nun-ah a lang chhuak thin a,  Mi rinawm pawh  a thusawi leh chetzia-ah ni lovin a rahchhuahna-ah a lang thin. Chu dikna leh rinawmna chu mitin nunah hian thuhrukin a awm a, a hmangchhuak ngam apiang chu Mi dik leh rinawm, huaisen an lo ni mai a ni..!! Nang i hmang chhuak ve ngam em le? He zawhna pawimawh tak hi a chhanna chu nangmahah khan a lo awm reng a nih chu ?

Hlima Ralte/Nov.22,2009