Vawiin-a thlaite
duhzawng incheina hi kan rual u te leh upa lam te chuan ‘Uchuak’ an ti
a, ‘Nalh’ an ti lo a, an ‘Eng-helh’ deuh a nih pawhin thil makah
ngaih tur a ni lo. An ni ho pawh hi an vang lai leh tleirawl chhuah lai a an
incheina leh an khawlai nun kha an rual u leh an nu leh pate khan an ngaimawhin
an sawi sel ve tho. Chutiang zelin kan pi leh pute - Siapsuap era atanga
vawiin-a kan thalai te incheina - kekawr kap tawi, lai lang kawr, fen-chhing-chhawng, mawza sei leh
lubuk-kekawr zuih thleng hian, a
ngaimawhtu leh enghelhtute tan chuan luhaina tham leh vei tham chu a awm
takmeuh mai..a la awm zel dawn si..!!
A tu-a te mah hi insawi sel-a in
sawi mawi tur kan awm chuan loh lai hian, in ngaithiam a, in tha en mai mai lah
chu a tih chi chuang si loh. In enliam-in, in thlah zalen ta viau ila - Swim
suite nena bazarpui-a tei ta nawlh nawlh
te lo awm ta se..?? Chu em a nih loh pawhin Over coat leh Beatle shoe nena
Football khelh tum talh te lo awm ta se..football discipline chuan awmzia a nei
lo nghal ang. Tin, kan Kohhran upa te
leh kan Pastor te hian Sport Dress nen Sacrament han sem ta thiau thiau mai se
la, chu sacrament dawhkan chu khelmualah an chhuah em lo a nih pawhin an wine
sem tal chu a ti zahawm lo hle ngei ang. Chutiang zelin..kan nula te hian Pub
leh Party-naa an lam pui/incheina kha Kohhran inkhawmpui leh Biak in-a Usher-a
an tanna-ah rawn feng/ha chhuak leh ta
mai se la, chuta lawi Kohhran member tam tak leh hruaitute chu an rilru a nat
viau loh chuan Kohhran ngaihtuahawm tak an ni ngei ang.
Mi tin hian incheina-ah hian zalenna
zau tak kan nei a, kan mawi tih zawng leh a tun lai ber ber te pawh in bel a
tha e. Amaherawhchu - A hun leh hmun a zira kan incheina kan thliar hran thiam
si loh chuan mi nuih tizatu leh mit tikhamtu mai kan ni ang. Tin, kan intih
tunlaina leh kan incheina manto te chu mi mit hmuhah chuan a mawina aiin a hatu
min ngei phahna-ah an lo chang anga, intihchangkan kan tumna chu kan mawl zia
pholangtu lek an lo ni ang.
Heng avangte hian tunlai fashion te
hi hnualsuat a, endawng mai tur kan tihna a ni lo va, thawmnaw manto leh tha
inbel kan sawi chhia a ni hek lo. Kan neihin a tlin tawk ah a tha ber, a mawi
ber leh a tunlai ber bera inchei a tha e. Amaherawhchu, a hun leh hmun thliar
thiam erawh a pawimawh a, kan nihna leh kan dinhmun mila ka inchei thiam a la
pawimawh leh zual. A bikin heng hmun
zahawm - Biak in leh puipunna hmun ang-ah te, Committee na leh Office hmun-ah
te chuan zahawm taka inchei (Formal Dress) hram hram hi mi changkang awm dan a
ni. Tin, Biak in leh mipui punkhawmna-a chanvo nei tu te, Mipui hmaa chetla
thin leh Receptionist/Usher te phei chu mi mit tikham lo thei ang bera felfai
leh hmuh nuam taka kan in chei hram hram a pawimawh. Chutiang zelin kan taksa,
lu leh sam chei dan thlengin a hun leh hmun i thliar hrang thiam ang u.#
- Hlima Ralte/March 2010
No comments:
Post a Comment