Ka dawn thin Hringnun kan damchhung,
Saruakin khawvel kan hma chhawn a,
Sentet-ah Chunnu tang belin lallai kan chen.
Mim ang lo thang, duhai samin hring nun kan chhiar,
Saruak vekin khawvel chhuahsan a tul leh thin.
Damchhung ropuina leh nawmsakna umin
Hringnun kan chhiar, zaleng zawng ten.
Neih tam poh leh rual awh a sang zual zel
Chim lem a awm lo, lungngaihna ti tamtu mai a ni,
Pial ral a thleng lo, saruak mai kan ni e.
Hmingthanna leh larna te hi,
Belh chian an dawl lo, nun raltitna mai.
Damchhung ropuina pawh a vul lai a rei chuang lo,
A vanglai thliah chakin hmelma an lo hnai thin;
Bihrukna zawngin hring nun an hmang leh si.
Lalna leh thuneihna chakin kan um,
Duhamna leh mahni hmasialna khawvel-ah.
Hringnun buai leh ralti reng rengin an hmachhawn,
Nun zalen leh hringmi inlaichinna ngaihsak thei lovin;
Khawvel buai leh rikrapna tinreng an hmachhawn si.
Thiamna leh finna te umin kan tlan,
Thiamna a san poh leh hringnun buaina a tam.
Mifing pawh an inchhandam thei hek lo,
Thiamna leh finna chu hringnuna thil pakhat a ni a;
Thih hnu piah lamah chhawm tlak a awm chuang lo.
Tap hmel hmuh aiin nui hmel hmuh a nuam a,
Min nuihpuitu aiin min tahpuitu an hlu zawk si.
Engthawl leh hlim taka Hningnun hman kan duh a,
Tahna tello hringnun chuan hlimna thuruk a tem pha si lo;
Hringnnun hi tahna mittui-a thuam mawi a lo ni.
Hmangaihna hi Hringnun laimu kan ti maw?
Tunge rilru hah leh nun beidawnga rum thin a,
Tunge mahni laina leh ama nun ngei phatsan thin te hi?
Hringnun Hmangaihnain phuar, a zuna uai thinte an ni;
Hringmi hmangaihna chu mahni hmasialna mai a lo ni.
Ngai teh hring nun dam chhung tawi te hi,
Krista tel lo chuan lungngaih leh tahna mai a lo ni.
Tahna-in kan tan a, tahna-in kan khar leh thin,
Thlamuantu Krista nena Hringnun hman chu;
Tah chang awm thin mah se, Vanah kan lawm a kim ang.
- Hlima Ralte 16/6/2016
No comments:
Post a Comment