Thuthlunghlui huna Pathianin a hnena inthawina a lawm em em chu Ran
thisen-a inthawi a ni. Israel fate kha maichamah an sualte ngaihdam nan leh
thupha chawi nan Ran thisenin an inthawi thin tih thuthlunghlui kan chhiar
chuan kan hre awm e. Khang ran thisen te kha Lal Isua thisen, kan sual zawng
zawng te tlan nana chhuak tur entirna mai an ni a. Chatuan Pathian thil ruahman a lo thlen hunah
chuan Lal Isuan Kross-ah ama thisen ngei hmangin a rawn tinghet ta a ni.
Chutichuan, mi
zawng zawng, mi sual leh mi tha pawh, rethei leh hausa, lal leh chhiahhlawh te
pawh in ang vekin tlanna kawng khat
chauh a buatsaih a. Chu chu Lal Isua Thisena tlanna chu a ni. Kan sual te tlan nan Lal Isua thisen kha a lo
luang tawh a, ka tan Kalvari tlang Kross ah khan ka Sual thawina atan talh a lo
ni daih tawh a ni. Chu tlanna chu ka tan a ni
tih hria a, kan rin chuan Chhandam ka lo ni reng mai a nih chu..!! Isua
thisena “Tlan” kan lo nih tawhna kha pawm mai tur a lo ni.
Pathian chuan
mihringte suala an tluk khan he thuthlung hi a lo ruahman fel vek tawh. A fapa
thisen ngei mai chu Mihring fate sual thihna ata an lo nun leh theih nan a lo
ruahman lawk a ni. Chu chu vawiin thlengin ka chanvo a la ni reng a, a la ti
danglam lo va, a tidanglam hek lo vang. PathianChatuan thil ruahman a nih tlat
avangin.
Kan tana
tlanna famkim awm chhun chu Lal Isua Thisen chauh hi a lo ni. Chu thisen chu
Pathian ngaihin a tha tawk a, a tling
tawk a, a thianghlim tawk a ni. Keima thatna leh felna te, ka inpekna leh ka
thahnemngaihna te hian min chhandam dawn lo va, Isua thisen-ah chauh khan
chhandam ka lo ni.
Kan Kristian
nunah chaklohna hrang hrang kan nei thin. Kan rinna pen san turin sualin nitin,
zan tin, darkar tin min bei a, achang chuan min bawhbetin mahni inrinhlelhna
thlengin min neih tir thin. Chutih hunah chuan Isua thisen kha a la ngai renga, ka sualte tlenfai nan a la tha
tawk a ni tih I hre nawn fo ang u. #
-Hlima Ralte/Nov.15,2009
No comments:
Post a Comment