Engatinge Missionary-ah i kal
loh? Engatinge Full Time-a rawngbawl tura i in pek loh ?, Engatinge Pastor i zir loh ? Engatinge
Zaipawlah i tel loh.? Heng zawhna leh
chhanna tlanglawn ber ni-a lang chu
“Kohna ka dawng lo” tih hi a ni awm e. A dikna chen a awm thei ang,
thusawitu leh rawngbawl lai ngei ngei te pawhin Pathian kohna dawng lo va pen
chhuah ngawt a pawi zia te, a hlauhawm zia te an sawi fo mai.
Mahse
- Pathian kohna hi engtia dawn tur nge,
eng anga chianga hriat tur nge tih chu a tehna a inang lo thei hle thung
ang. Mi thenkhatah chuan Lalpa’n min kohna bik tak leh a aw hriat chu a awm teh
meuh ang. A nawlpui erawh chuan chutianga kohna chu kan dawng vek kher lo tih
hi chu a chiang reng mai. Chumi a nih avang chuan Kohna kan dawng lo tihna chu
a ni miah si lo.
A
bik taka ruat lawk emaw, koh bik kan nih si loh chuan, kan rawngbawlna tur
hian min rawn zawng dawn hran lo va, min rawn bel lui dawn hek lo. Keimahniin
kan phak tawk rawngbawlna kan dap zel a tul zawk a ni. Chu chu Pathian min
kohna a ni zawk fo thin.
“I
khaw lam ata chhuak la, ram ka la entir tur che lamah chuan kal rawh” ti a Abrahama hnena Pathian kohna kha a specific
hauh lo.. Abrahama chuan Kohna chu a hria, khawilamah nge tih a hre bik lo.. a
chhuak tawp a, Pathian aw a ngaithla zel a nih kha.. “Khawvel zawng zawngah kal
ula, .....Chanchin Tha hi hril rawh u” ti-a min kotu hian “chutah chuan,
chumite zingah chuan, chumi hna chu va thawk rawh” tiin min hrilh si se kher lo. Mahse chu kohna chu kan chhan a, Amah rinchhan chunga pen chhuah
phawt chuan min mamawhna zawn leh mih dahna chu kan hre chiang telh telh mai
dawn a lo ni.
Khawvel zawng zawngah, thilsiamte
leh mihring te hnena Chanchin Tha hril hna- “Kohna nung reng” hi
engemawti zawng tala kan lo chhan ve a, Lalpa rawng bawl tura kan inpek
pumhlumna hi Kohna chhan dan chu a lo ni leh mai a ni. Chuvangin kan phak tawk
rawngbawlna te hi hnualsuat lovin theihtawpin i thawk zel ang u.
- Hlima Ralte/Jan 8, 2012
No comments:
Post a Comment