Danglam lo Krista-II

Danglam lo Krista tih hi kan sawiin kan ziak zeuh zeuh tawh a, kan la sawi zel ang a, kan Unit TKP Diamond Jubilee thupui a nih vang chauh pawh ni lo vin, Kan Pathian Danglam ve ngai lo leh Chatuana pangngai reng tur, Awmtawha leh Awmmeka leh Lolaawmtura hi sawi tam luat a awm thei lo va, sawi zawh a awm thei dawn lo a ni.

“Danglam lo Krista/Pathian ” tih sawi dawn chuan a anpuia siam mihringte kan danglam thin zia tlem tarlan phawt a tul thin. Heti hian tawi te te-in lo sawi hmasa i la.

1.Hunin min tidanglam thin : Mihringte chu hunin min ti danglam a, ka hun tawng  ang zelin kan danglam thin, kan taksa a danglam a, kan rilru leh thlarau nun thlengin hun hian min thlakthleng thin.

2. Kan thil tawnin min ti danglam thin: Kan thil tawn leh kan boruak tawnin kan rilru a tidanglamin, hlimna te, lawmte, lungngaihna leh tahna ten kan nun kan hman chhawk reng thin.

3. Kan kiang vela miin min ti danglam thin: Kan kiang vela thil thleng leh thil awm ten kan nun a sawi danglam a, kan environment a zirin kan danglam fo thin.

4. Sualna leh khawlohna avangin kan nun a danglam thin: Sualna leh khawlohnain kan nun min ei chia a, kan nun asawi chhia a, khawtlang leh ram leh hnam thlengin min sawi nghing thin.

5. Kan Moral a danglam thin: Mi tha leh fel kan tih te pawh hi an lo danglam thin. Nimina hmingtha em em kha vawiinah chuan sawituilo khawpa hmingchhia leh hmusitawmah an lo awm leh thin.

Kan Pathian, Isua Krista chu hengah hian a danglam ve lo va, Chatuana a thu tlungah a ding nghet a, a tih tur a sawhsawn ve lo va, a thiltihtheihna leh a Lalna chu a pangngai reng a ni. Heti hian lo sawi i la:-

1.  Chatuana Danglamlo Pathian: “Kei Alpha leh Omega, a bul leh a tawp ka ni”(Thup 1:8);  “Tihtakmeuhin2 ka hrilh a che u, Abrahama awm hma pawhin ka awm tawh” (John 8:58). Kan Pathian hi Lei leh van te awm hma atang khan vawiin thlengin a la pangngai reng a, a rorelna leh a Lalna te, a thiltihtheihna leh a thuneihna te chu chatuan atan a ni. Leilung hi lo danglamin, vante khi ral mah se, kan Pathian chu a  danglam ve dawn lo. Amah ngeiin - Lei leh van an boral anga, ka thu erawhchu a boral lo vang a ti a ni. A remruatna leh a thil

2.     Hmangaihna danglam ngai lo Pathian : Eden huana Evi bawhchhiatna avanga anchhedawng, chatuana boral tur – min hmangaih avanga tlanna min rawn siam sak tu – Uire denhlum tur ngaidam thei tu, Misualte hnena thleng thin, Kraws lera amah khengbettute tana tawngtaia kha - vawiin thlengin A hmangaihna a la ngai reng a, a hmangaihna chuan a hnen pan turin min la sawm reng a ni. Enganga sual bawlhhlawh pawh nimah i la, min la ngaidam thei reng a ni.

3.      Innghahna tlak Isua/Pathian: Rinna Pa, Abrahama Pathian, Goliatha hmaa naupang Davida thlahthlam lotu Pathian, Elija Maicham hal alhtu Pathian kha vawiinah hian a la ngai reng a, Vawiina Sangthankima te biak Pathian, Kan Pathian ngei hi a la ni. Amaha innghatte chu a thlahthlam ngai lo va, a kalsan ngai hek lo. Innghahna tlak a la ni reng a, a la danglam lo. Amaha innghat tlat te chu a kalsan ngai lo.

4.      Chhandamtu Ngai reng, Chanchintha danglam lo: Vawikhat min chhandam nan a thi a, chhandamna dang a buatsaih lo. Kan tan vawi khat a thih kha a a tawk a, Lal Isua Chanchin Tha lo chu Chanchin Tha dang a awm dawn hek lo. Pathian chatuan thil ruahman kha tih danglam theih a ni lo va, sawi danglam theih a ni hek lo. He Chanchin Tha hi Khawvel tan damna a ni a, Isua Krista thihna leh thawhlehna Chanchin Tha hi vawiin thlengin a la pangngai reng a ni.

5.    Hruaitu Danglam lo: Ur khua atanga Abrahama hruai chhuaktu Pathian, Lota leh a chhungte Sodom khaw boral tur lak ata hruai chhuaktu, Aigupta sal atanga Israel fate mei alh leh chhum dinga hruaitu Pathian,  Mizote- Thingbul/lungbul hmaa inthawi a, hnam leh hnam, khua leh khua in runa, mi lu la thin te, vawiina amah faka, ama rawngbawl tura min hruaitu leh  tuna TKP te Diamond Jubilee kum min hruaitthlengtu kan Lalpa Isua Krista hi a a danglam lo. Saltanna, awpbehna leh retheihna bawih ata min hruai chhuaktu, natna leh lungngaihna lak atan min hruaitu Isua Krista hi a danglam ve dawn lo. Amah ring a, amah zui duh apiang a hruai zel dawn a ni.

“Isua Krista chu niminah nen, vawiinah nen, a pangngaiin a awm fo vang” (Heb 13:8)


                                                                                                                                     -Hlima Ralte/13th Feb. 2011