Rawn pên chhuak ve tawh ta che..

Mi tam tak chu Khawtlang-ah leh Kohhran-ah te, Pawl hovah te hian mawhphurhna leh hruaitu chan chang a, a kul ataia thawk ve tur ni lovah kan in ngai nghet tlat thin a. Tu te emaw tih turah kan dah tawp a, Khawtlang leh Kohhran, Pathian ram veinachang pawh hre lovin mahni awmhmunah kan lukawlh hawi mai mai a. Mahni  phak tawka tangkai tumna reng reng kan nei lo.

            

Thenkhat chuan kan kum a la naupang em a lawm..kan ti a ni mai thei. Tin, thenkhat chu kan inchhungkhur dinhmunin a zir lo te pawh a ni ang. Amaherawhchu keimahni zawn theuhah hian engemaw zawng tal chuan mawhphurhna kan nei ve a ni.

            

Tuna Kohhran/YMA/ TKP-a kan hruaitu tam takte hi an kumin a phu tawh em vanga hruaitu rawn ni thut tumah an awm lo. A tam zawk hi chu an naupang  laiin KNP/YMA chhang atanga in hmang chho a, member pangngai an nih chhoh hnu-ah pawh phak ang tawk tawk a hruaitute hnung zuia lo pen chho ve bek bek te an ni. An lo hah rei tawh a sin. An thachhang dawl tur hian tu te nge rawn pen chhuak ang le ?

            

Zirlai kan nih chuan Kohhran leh khawtlangah inhmang lovin kan zirna-ah kan in concentrate tur a ni kan ti thin a. A dikna pawh a awm mai thei. Mahse, zirlai kan nih lai atanga kan phak tawk leh kan tlin ve tawk rawngbawlna leh mawhphurhna hlen ngai lo kan nih chuan eng ang a zir sang leh thiam thei pawh ni mah ila, Pathian leh Ram leh hnam tana mi hman tlak-ah kan chhuah a rinawm lo a ni.

           

Pathian ram tana thawk tur leh Ram leh hnam/khawtlang tan hian Hun tha i neih lai leh, i la chak a, i la hrisel that lai ngei hian Pathianin a ko che a, i  ramin a mamawh che a,  i  awmna khawtlangin a nghak reng che..  Rawn pen chhuak ve tawh ta che..

- Hlima Ralte/24^th January 2010