Ka tel lo chuan ?

Mihring nun-ah hian mimal leh chhungkaw inrelbawlna bakah thil tel ve tlat chu Khawtlang leh Sakhuana thila kan chen hona/khawsak hona (Society and religion) hi a ni. Mahni leh mahni ringawt ngaihtuah theih a ni lo va, kan khawtlang, ram leh hnam lakah mawhphurhna kan nei a. Chumi piah lamah rawngbawlna kawngah mawh-phurhna lian tak kan nei bawk tih  hi kan hriat nawn fo a tul a ni.

Ka tel lo hian Khawtlang leh ram leh hnam hi a kal thei teh meuh mai. Ka pian hma kum sang tam tak atang tawh khan khua leh tui neiin, ram leh hnam a lo ding tawh. Kan Pathian pawh hian a rawng bawl tur hian kei lo hi mi tam tak a nei. Rawngbawlna peng hrang hrang hi a kal mup mup mai a nih hi.

Amaherawhchu khua leh tuite zingah ka tel ve duh a nih chuan khua leh tui inawpna dan leh  min phut ang chu ka tih ve erawh a ngai a, ka duty a ni. Chutiang bawkin ringtu(piangthar) ka nih chuan Pathianin tih tur min ruat, rawngbawlna-ah ka tel ve hi ka bat a ni. Ka hmun ruak hi tuman an luah khat dawn lo va, ka aiawh khawvelah an piang tawh dawn lo. .. “Ka tel lo chuan...an lo buai palh ang... an lo hah lutuk bik ang.... ka tel lo chuan an lo khawhar ang..etc” chutiang ngaihtuahna rilru chu i pu thar theuh ang u.

- Hlima ralte/19^th June 2011