Kristian Chhungkaw Ni leh Serkawn

Kristian Chhungkaw Ni  hi Serkawn Kohhran hian kan hmang urhsunin kan ngaipawimawh em em thin a. He ni a lo her chhuah hi chuan, Pathianni zing Inkhawm hi naupangte pawhin kan nghakhlel em em thin a ni. Kohhran/KNP Zaipawl leh Special Item hrang hrang bakah - Chhungkuaa changvawn sawi te, Bibble chhiar rual te, Chhungkua-a zai te leh chhungkaw aiawha Duet leh solo te leh Special numbers engngemawzat a awm thin a ni. Hengte hi chawi nun zel a tha hle mai.

            

Tun hma leh deuh-ah chuan Kristian Chhungkaw Ni kher lovah pawh Pathianni zing Inkhawmah chhungkaw thutna neiin chhungkua te te-in an thu thin a. Serkawn Kohhranin hma kan sawn ve zel a, member pawh kan lo tam zel a, chhungkua-a thutna bik neih te, chhungkua-a tlar khata thut tlan te a lo rem vek thei ta lo nachungin, chhungkaw tam tak chu tun thlengin kan la thu tlar thip thep thei te hi a hmuhnawmin a hlu hle a. Kristian chhungkaw hlimthla a lo lang thin a ni. Hetiang hian inkhawm apiangin kan ti thei vek tawh lo a nih pawhin Kristian Chhungkaw Ni-ah hi chuan han thu ho leh thei thin ila, a la hlu reng a ni.

            

Kan kohhranin he hun kan hman dan danglam leh pakhat chu Kristian chhungkaw ni-ah hian Chhungkaw engemawzat-in an chhungte Ropuina rama haw  tawh te hriatrengna atan Biak In-ah Pangpar mawi tak tak an rawn khawi thin  hi a ni. Kohhr2n Secretary-in Pangpar khawitute chhungkaw hming a sawi pahin an then takte hming a tarlang pah zel a, an pangpar khawi nen kawhhmuhin a puang dan dan thin a ni. Hei hian Kohhran mipuite rilru nasa takin min ti pumkhat thin a, chhungkaw tam tak an chanchin kan lo hriatpui ve lem loh te pawh kan hriat chian phahin, inlainattawnna leh in hriatthiamna thuk tak min siam sak thin a ni. Kuminah pawh hetianga chhungte Chatuan ram min pansan ta te puala pangpar khawi hi awm leh turah ngai i la, i chhawm nung zel ang u.  He tradition hlu tak mai hi chhawm nung zel i la, Kristian Chhungkua (Pathian chhungte) kan nih tilangtu leh Kohhran chhungkua min phuarkhawmtu atan i hmang zel ang u.

            

Aw le, kan lo hman tawh dan te, kan hman mek dan te leh kan duhthusamte chu engpawh ni se la, a pawimawh berah chuan “Keini chhungkua hi Kristian Chhungkua-ah kan in chhal ngam ve em ? ” tih hi chhungtinte in zawt i la. Kristian chhungkua, Pathian hriat chhungkua kan nih theuh theih nan tawngtaina nen, mahni in hlan thar leh theuh ang u. He ni ropui tak hi chhungkaw tin ten Pathian kan hnaih tlanna hun leh kan infuih tharna hun ni thei se tih hi a duhawm hle a, chutiang taka kan hman theih nan chhungkua leh Kohhran tinte infuih thar leh ang u.

- Hlima Ralte/May 20, 2013