Tlanna leh Chandamna

            Tlanna leh chhandamna te, tihsual leh nihsual te hi tam tak chuan kan thliar hrang thiam thin lo va, Kristian nun kawng leh Piantharna chungchangah kan buai phah fo thin. A hmasain mihring nihsual chungchang bible-in min hrilh dan lo en i la. “Chutichuan mi pakhat avangin sual khawvelah a lut a, sual avangin thihna a lut bawk a, chutiang bawkin mi zawng zawngin thil an lo tihsual avangin sual khawvelah a lut a, sual avangin thihna a lut bawk a, chutiang bawkin mi zawng zawngin thil an lo tihsual avangin thihnain mi zawng zawng a fan chhuak ta”(Rom 5:12). “Tin, mi zawng zawngin thil an tisual tawh vek a, Pathian ropuina an chang zo ta lo a ni” (Rom 3:23).                     

            He lai Bible changin min hrilh chu mihring hmasa ber Adama leh Evi chu suala an lo tluk tawh avangin an thlahte zawng zawng chu anmahni avangin sual sain kan lo piang vek a. Adama thlah zawng zawng chu nihna sual nei sa vek kan lo ni a, kan thil sual tih engemaw chu kan sim thei ve fo thin, amaherawhchu kan nihna sual, Adama thisen atanga kan rochun tlat chu sim theih a ni lo. Entir nan: “Adama thlah ka nih hi ka duh tawh lo, kan sim daih teh ang”, ti ta ila mi ten min tih dan tur chu kan hrethiam mai awm e.

            

He Adama thlah sual kan nihna tak mai hi Pathian ngaih pawimawh ber chu a ni a, mihring te, chatuana kan boral mai tur chu ngai ngam lovin, tlanna hna chu amah Pathian vekin a ngaihtuah a lo tul leh ta a. Pathian chuan sual a ngaidam mai thei lo va, chuvangin mihringte chatuan boralnaa an kal vek mai tur chu ngai ngam lo vin, khawvela mihring awm zawng zawng te hremna chu a fapa Isua Krista-ah a nghat a, Kross ah a lo hrem ta a ni. He tlanna hna thawh hian hnam tih bik a nei lo va, Muslim te, Hindu te, Budhist te, khawvela mi zawng zawng a huap vek a, chuvangin mi zawng zawng hi Adama thlah sual kan nihna chu Lal Isua thihnaah hian kan fihlim vek a, Adama thlah sual chu Kross-ah chinfel vek a lo ni ta a ni(Rom 5:12-17).

            

Chutiang a loh nih chuan mi zawng zawng chu chhandamin kan awm vek mai dawn em ni ang ? Pathian thu chuan tihian min hrilh “Chutichuan Pathian nung chu kan rin avangin kan thawk rim a, kan bei hram hram a ni si a, a ni chu mi zawng zawng chhandamtu a ni a, a ringtute chhandamtu a ni deuh ber mai”(ITim 4:10) Tin, Johana 3:16-ah “Amah chu tupawh a ring apiang an boral loh va, chatuana nunna an neih zawk nan”, tih kan hmu leh a. “Tupawh a ring apiang” tih hian mi zawng zawng a huap leh vek a, kan tih ve tur awm chhun chu ‘RIN’ a ni ta mai a ni. Chutichuan Tlanna chuan khawvela mi zawng zawng a huap vek a, Pathianin kan nihna sual leh tihsual hrang hrang avangin mi a hrem dawn lo va, a fapa Isua Kristaah a lo hrem vek tawh avangin. Amaherawhchu, chu kan sualna, Kross-a a lo chinfel tawh, kan rin duh lohna sual erawh chu chatuan hrehawmnaa kan kal chhan a ni zawk dawn a ni.

            

Nu leh pa tam takin kan fate kan zilhna leh kan hauna te kan ngaihtuah chiang lo fo thin. Entir nan: “Chumi khami chu ti suh, meidilah i kal mai ang” tih te, “Chumi khami chu ti rawh, tichuan vanramah i kai ang” te kan ti leh mai thin a, hei hian naupang rilruah a than hnan a, a lo puitlin hunah pawh, kan sual man bat Kross-ah min lo tlak sak vek tawh tih leh Chhandamna, Pathian khawngaihna avanga a thlawna lak mai tur hi thawh chhuah ve phet tumin thil tha tih leh tih loh va chhandamna emaw tih a awl riau va, a thlawna chhandamna hi mi a hmuh thleh tir thei a ni tih hriain i fimkhur ang u.

            

Aw le, tlanna chu hriain chhandamna pawh kan lo nei ta a, sual thei lo, famkim ta kan ni reng reng lo. Amaherawhchu kan fel lo leh tling lo chung chung hi Lalpa’n Krista avang chauhin mifelah min ruat a. Chuvang chuan kan felna Isua, kan thianghlimna Isua, kan thatna Isua a lo ni a, chhandam nih tum vang ni lovin, chhandam kan nih tawh zawk avangin tisa taka kan sim theih loh tam tak chu Rinna hnathawh leh rah chhuah avangin awlsam takin a lo sim theih ta a ni. Mi tam tak chuan kan sualte sim hmasak te te a, Isua pan tur emaw kan ti fo thin. Chutiang chu Pathian ruahman dan pawh a ni lo. Kan awm ang ang hian pan mai tur a ni a, Pathian khawngaihna a thlawna lak mai theih chu kan chanvo ngei a ni ti a kan lak phawt chuan, chu kan rinna rah chhuah mawi tak ‘Simna’ chu a lo awm chawpchilh mai dawn a, Thlarau Thianghlim tanpuinain khawngaihna leh rinna chu kan nunah a lo thanglian zel dawn a ni.

- Hlima Ralte/November 2010