Hring Nun – I

Hrilin ka puang dawn e, hring nun duhaisam,

Sen lai nau ang ka pian ni chuan, 

Duat ten min chawi, Chunnu'n tang nem ah,

Hlim zai a vawr, biang sum min hawi;

Zuapa lunglawm phei khai a zang ngei e.

Biah nem min hlan, nui sen senin,

Min fuih hluan e, hmasawn  biahthu;

Ka theih tawkah duhai sam a kim lo,

Fuihin min au.. ding le le, kal chhet chhet, 

Phak loh ban tumin luaithli ka nul leh thin.

Hnuntui ngai sen lai nau ka cham a rem tawh lo,

Hnutiang chhawna, phei lai vawr a tul,

Chunnu banah kaiin thlertin ka fang,

Zaleng zawng ten lawmin min hawi,

Chutin pan lai nun ka chen, kan hlim ngei e.

Min lawi tir e, Sikul runah, lenrual an tam ngei,

Kum bi chhiarin zir a pung zel, zirna run belh chu;

Cham a rem lo, pawl sawn a tul, hmatiang sawnin,

Pan lai nun leh thiam zirlaibu an lungrual thei lo;

Zawh loh thiambu min ban, thinlai a zing,

Rualpui khum tum reng zawng, tahna a tam ngei e.

Pan lai nun-ah cham sei a rem lo,

Zuapa lung ka dum lo, hmatiang sawn lo chuan;

Dam ten lo seilianin “Valmawi’ sakhming  min ban,

Chunnu lawm a kim ngei e,  ‘Val’ sakhming ka tawnah;

A chhuang ngei e, zua pa’n, a fa hming koh, 

Chun leh zua lung lawm a kim rei lo, hmatiang a thlir,

Hrai chawi duat lai kawppui chawi hma chuan;

Tlang than an dawn ngam lo –‘val senior’ ka tawn ah,

A zawng ruai e thler tin, khua tin-ah, run ka lumpui tur;

In hai em ni, ka duai bil lo, phu tawk leng chhai nan.

Zuapa iangin hring nun ka dawn, runlumpui tel lova len reng chu,

Hringnun a kim lo, hrai chawi lo va mahte'n run nghah;

Hmangaih Par tlan ka nuam e, kumtluang runlumpui nen,

Duatlai nuthai nen fanau chawi a, run kan mawi chuan;

Duhai sam a kim ngei ang, hring nun kei ka tawn ah.

Phutawk lung di zawng ve ta’ng e, hring dan-ah

Tha sensiar, lungdumtu mi u ka tawn ni chuan;

Biah zainem inhlanin runlumpui kan tiam e,

Har-mei kan det, zaleng kan hrai, hlim zai kan vawr

Lawm a kim ngei e,  kan sum tualah ar ang a lawi hi.

Chim lem a nei lo, hring nun duhai sam hian.

Fanau chawiin runlum pui nen chhung kan kim e;

Hrai chawi fanau lo thang lianin, runin an mawi a,

Rual awt lova, an duhaisam tihhlawhtlin nan;

Thawk zel ta’ng e, engpawh huamin hrailengte tan.

‘Samah sam lut a awm nem maw’ pi/puten an lo tih chu,

Sentet ata  hmatiang thlir leh duhaisamin hringnun kan hmang;

Chhungkhur khawsak, a hniam leh sang, eng pawh ni se,

Duhai sam a bang chuang lo, lunglawm a kim chuang lo;

Kan phak loh zel neih duhna-in hring nun a lo khat si.

Hlima Ralte 

29/02/2016